කෙල්ලෙක් නම් සැලොන් චලෝ - කොල්ලෙක් නම් ජිම් චලෝ ||||||||||||| වෙඩිමක් නම් මේ දෙකට ම - උදේ හවා චලෝ චලෝ...

මේ දවස් වල ඇවරිතුමා අධික වශයෙන් රාජකාරිමය කටයුතු වෙනුවෙන් ඇප කැප වෙලා තියෙන නිසා මායියා තුමියගෙන් කොළේ ඉරාගෙන ඉන්නේ. යක්කු ගස් නඟින වෙලාවට ගෙදර ඇවිත් ආයෙත් මගේ කෝල් එකෙන් ම නැඟිටින ඔයා, ටිකක් ඉන්න බබී ලැහැස්ති වෙලා එන්නම් කියලා ගියාම දවසේ ම මීටින්ස් වල. ආයෙත් මාව මතක් වෙන්නෙ දවල්ට කන්න කලින් තමයි. මොකක්ද මේකෙ තේරුම හෑ? ඇවරි හාමිනේ උත්තමාවිය ඉර මුදුන්වෙන ජාමේ හීයක් හාන්න ගත්තේ ඇවරිතුමාගේ හොඳම සේවාදායකයන් පිරිසක් සමඟ ඉන්දැද්දි.

වයන්න සිතාරෙ 

වයන්න ඔබේ

සංසාරෙ මා දන්නා වූ නාදෙකි එන්නේ

මනරම් බැනුම් රාවේ 

මගෙ කන් -

පිරේ නෝනෙ...//

ඒ ටික කියලා  ඩබල් බැණුම් අහගන්නවා. ඔයාට නම් විහිළු. දැන් කොහෙ ද ඉන්නේ? ඔයාගේ ඔෆිස් එකේ ඔය සේරම වැඩ කරන්න ඉන්නේ ඔයා විතර ද අනේ...? ඉතිං ඇවරි තුමා නගුට දෙපරැන්දෙ ගහගෙන උත්තමාවිය වෙනුවෙන් පිළිතුරු සපයන්න වුනා. ඔයා දන්නවනේ ෂත්තලං, අපේ ලොක්කගේ හොඳ ම ළමයා මං තමයි. ලොක්කගේ කෙරුවාව දන්නේ මං තමයි. ඉතිං බෑ කියන්න බෑ.... (ඔයා වගේ ම) ලොක්කත් මට ආදරෙයි.. ලොල්. එහෙන්නම් උන්නැහෙත් එක්ක ම ඉන්න එකයි ඇත්තේ. මැතිනිය බැන බැන දුර බනනය මත රිසීවරය දඩාස් ගා පතිත කළා.

ටින්කි ටින්කි ටින්කි ටින්... වාසනා ලොවක් ගෙනා ව දිව්‍ය ලෝකෙ ඉඳලා ආව කෙල්ලේ.. සුරූපි කෙල්ලේ.. සින්දුව අල්ලපු වර්ක් ස්ටේෂන් එකෙන් ප්ලේ වෙද්දි මං මාර්කි දිහා බැලුවේ කන්න වගේ..

කූල් මචං කූල්... අම්මෝ දාහකින් සම්පතයි බං. තව පැයකට විතර කෝල් එකක් එන්නේ නැතිවෙයි නේහ්?. මාර්ක් කිව්වේ ඇවරිගේ විරෝපට්ටම් මූඩ් එක කෝල් එක නිසා කියලා දැනගෙන. හ්ම් බලමුකෝ කියාගෙන කඩිනම් වැඩ ටික අහවර කළ ඇවරිතුමා තමුන්ගේ සුකුමල සඳ කොමලී නැතුවට කිසිවිට පියවදනී වෙත හැරෙන තැපෑලෙන් කෝල් බැක් කළේ ඇය දෙකට දෙවාරෙ මහ දවල් ෆයර් නොවන බව අත්දැකීමෙන් දන්න නිසා. මූඩ් එක ෆික්ස් කරන්න ඇවරි ඇදලා පැදලා, මනමේ මෝඩ් එකෙන් වදන් අමුණන්න ගත්තා.

ඔබගේ සිත පිළිසිඳ ගත් ඒ කුකුස... මාගේ දැනගැනීම උදෙසා, නොවළහා කියනු මැන සොඳුරිය.. මේ මහා දහවලේ, වායු සමනය කළ සැප ඔපිස් කාමරේ වුව දාහයෙන් පෙළෙන මා ඔබේ කෝපාග්නියෙන් දවා හළු කරන්නට තරම්, මොළකැටි ඔබේ පෙම්වත් චිත්තය සැහැසි වූයේ මන්දැයි දැනගනු කැමැත්තෙමි..

අනේ මා මනමේ.... මා ඔබට නපුරු වූවා නොව, නොලසා ආලය කළා පමණකි..... අද දින උදා වරුවේ ඔබ විසින් දමන ලද ඇපොයිමන්තය කැන්සල් වූ වග, කියන්නට ඇමතීමි.... සැලොනයෙන් මා ලද, ඇමතුම ප්‍රකාරව, පෙරළා ඔබට ගත් සඳ.... ඒ කරුණ පිළිබඳ වගේ වගකුදුත්.... බොට මතක නැති හෙයින් දණ්ඩෙන් පහර කෑ සැපින්නක් මෙන් කිපුණෙමි...

හුට්ටප්පරේ... උදේ මං සැලොන් යන්න දාගත්තා නේද කියලා මතක් වුනේ ඒ වෙලාවෙ. අනේ බබා ඔය ෆේෂල් බේෂල් දාන්න නම් මට වෙලාවක් නෑ. අනික මට උදේ ම අර පෙන්ඩින් වීසා ඇපෘවල්ස් ටික බලන්න එම්බසි යන්නත් තියෙනවා. එහෙම කියලා කොහොම ද හරි ඉන්නකෝ, මම ඔය වැඩේ කෙරෙන තැනට වැඩ සිද්ධ කරලා ඔයාට කෝල් කරන්න. මොකක්??? මේ මොන ජෝක්ස් එකක් ද මේ? ඔයා නිකන් ජයලලිතාගේ නංගි වගේ නේ සුදූ?? දේකීයේ මේරා බච්චෝ. ආජ් තුම් සරූර් ෆේෂල් කරූන්ගී....

හාමිනේ ඇමතුම විසන්ධි කොලේ නිකන් දෙන්නම් ජම්බු මෙව්වා රාජා වගේ පුල් හින්දුස්තානි ටෝකක් දීලා. එන පොට හරි නෑ රාළේ. අමුඩෙ තදට බැඳගන්නවා හොඳයි.