2016ට ආවඩා ආයුබෝ වේවා..! හෙවත් වදන් කතත් කතත්තා....

හා හා පුරා කියලා පටන් ගත්තු ජනේරුවේ ඇවරිගේ සලාදය කියවන ගොසිප් ලැදි, චීත්ත ධාරී හිරි ලංකාවාසී, ලෝ වාසී, යේච දූරේ - වසන්ති අවිදූරේ ඒ කිව්වේ දුර - ළඟ වසන, සලාද නිසා ම වැනසෙන ඇවරිගේ සකල සියලු ෆෑන්ස් බුවා බුවීලාට ලැබුවා වූ නව වසර සාමය සතුට පිරි සුබ නව වසරක් වේවා කියලා ප්‍රාර්ථනා කළා හේනන්.

අවුරුද්දක් ඉවර වෙනවා කියනනේ කාට කොහො ම වුනත් ඇවරිට නම් අතිශය ප්‍රීතිමක් අවස්ථාවක්. මොක ද සතියක් ඇතුළත ඉයර් එන්ඩ් එකවුන්ට්ස් දෙන්න සිද්ද වෙන නිසා පුල් මාවලස් කාලයක් තමා දෙසැම්බර් අවසාන සතිය කියන්නේ.  ටිකක් දිග නිවාඩුවක් ලැබුන නිසා බොහෝ දෙනා කොළඹින් පිට ගියත් ඇවරි ෆැමලි ෆස්ට් කියාගෙන ගෙදර ම ඉන්න තීරණය කළා. නැතිනම් ලොකු අක්කලත් එක්ක නුවර එළියට හරි ටිලින් සහ භද්‍රාවන් සමඟ ඇතුගල නඟින්න හරි ඉඩ තිබුණා. පවුලේ කස්ටියත් එක්ක හෝ ගානා පොකුණ බලන්න යාම තමා ඇවරි තුමා කොරපු එක ම සමාජ කටයුත්ත. ඇයි මව්තුමියන්ගේ පදවි ප්‍රාප්තිය වෙනුවෙන් කළ පිට්නස් ටෙස්ට් එක? අල වගේ ද ටිපිටිප් කිව්වලු.

පදවි ප්‍රාප්තිය කිව්වට ඒක පදවි හරණය නැත්නම්, නැවෙන් බැසීම වගේ ඇපිසෝට් එකකට ලයින් වෙන්න ඕනෑ. කොළඹ හත මහජන පුස්තකාලය හොල්ලා ගෙන, හැබැයි දහයට ගණින්න බෑ වගේ ඉන්න ඇවරි මාතාව ලැබුවා වූ දෙදහස් දහසයේ විශ්‍රාම ගැනීමට අපේක්ෂිත නිසා එතුමිය දැන් ම ඉඳන් ඒ සඳහා පෙර පුහුණුවීම් කරනවා. කොළඹ මහ නගර සභාවේ එකසිය පණස් වැනි සංවත්සරය වෙනුවෙන් පැවැතවුන උත්සවයේදී විසි පස් වසරක සේවාව ඇගයීමට ජනාධිපති සම්මානයක් එහෙමත් ලැබුණ නිසා මැඩම් දැන් යන්නේ තාර පාරෙත් අඟල් හත අටක් ඉහළින්.  

ඇවරි මාතාව හිස් එග්සලනසි ප්‍රසියාතුමාගෙන් සේවා ඇගයුම් සම්මාන ලැබීම

වයස කොහොම වුනත් අපේ මෑණියන්ගේ පොර ටෝක්ස් අනන්තයි. අප්පරමාණයි. අර කතාවට කියනවා වගේ වදන් තියෙනවා බෙදන් කන්න....ඔව් පෙන්ෂන් ගියා ම මං හැම පෝයට ම සිල් ගන්නවා. මේ මිදුලෙ ලෑන්ඩ් ස්කේපින් කරලා මල් පිපෙන ගස් ටිකක් ලස්සනට වවා ගන්න ඕන. ඉස්සරහ කෑල්ලෙත් බතල පාත්තියක් කොටා ගත්තා නම් උදේට කැඳ බීලා බතල කන්න ඇහැකි ආදී වශයෙන් ඇගේ රිටයර්මන්ට් ප්ලෑන් එකේ දිග පලළ ගැන පුංචි වෙළඳ දැන්වීමක් ඒ ගැන හාංකවිසියකවත් නොතකන, මහ හූරා ඇතුළු ඇගේ බත් ගිල දමන අම්බරු ප්‍රජාව වන අපි හතර දෙනා වෙත මුදල් නොගෙවාම විකාශය කිරීමේ පරමාර්ථය දන්නේත් එතුමිය ම තමා. මේ දිනපතා විකාශය අහන් ඉන්න ම බැරි ම තැන ගරු කටයුතු පියාණන් වහන්සේ ඒ ගැන තම අවම බලය පාවිච්චි කරමින් විමසීමක් කර හිටියා. කෝ ඉතිං ඕගොල්ලන්ගෙන් කිසිම සහයෝගයක් නෑනේ? බලන්න අර පස් කන්ද අයින් කරගන්න ඕන, එතන ලස්සන හදා ගන්න ඕන ආදී වශයෙන් ඇගේ සෝකාලාපය දිග හැරුණා ම සිරි ලංකා - ඉල්ලං කා කියලා උතුමාණන්ට යහමින් තේරුණාලු.

කවුන්ටර් ආර්ගියුමන්ට් එකක් වෙනුවෙන් ඇගේ බුර බුරා නැගෙන සෝකාග්නියට පිදුරු සරි කරමින් පිළිතුරු සපයන්න ස්වේච්චාවෙන් ඉදිරිපත් වුනේ සිරිපාල මහතා හෙවත් අපේ මෑණියන්ගේ දෙටු පුත්‍ර රත්නය. අම්මා ඉතිං ගෙදර හිටියොත් බිම කොටන එකමනේ වැඩේ. පහේ ගම්මිරිස් අඩුවැඩිය එකතු කළේ මිස් බිංගිරි මැණිකේ හෙවත් අපේ මෑණියන්ගේ හුරතලී. ආයෙත් අහලා එක්කෝ පොළොව කතත් කතත්තා නැත්නම් අපිව කතත් කතත්තා.. හැබැයි පොළොව කතත් - අපිව කතත් - බතල කතත් කතත්තා... නෑහ් ගොයියො අදත් බතල ද? මළා..

ඔයින් මෙයින් පිස්ටය අධික ජිල්පිට් ආහාරයක් වන බතල ගිල දැමූ ඇවරි පස් කන්ද කැපීමේ මෙහෙයුමට එන්ටර් වුනා. සාමාන්‍යෙයෙන් පස් කපලා විල්බැරෝවට දාලා ඒවා ගෙනිහින් දාලා තව තැනක් පුරවන එක ඇවරි කැමති වැඩක්. වරකට තමුන්ගේ ඉදිකටු ශරීර කූඩුවේ සහයෙන් පස් තාච්චි අටක් දාපු විල්බැරෝවක් අදින්න ඇවරිට පුළුවන්. කොහොමත් මෝර්නින් සෝ එක ඉවර වෙද්දි විලබැරැක්ක දහ පාළොහක් ඇදලා. දෙයියන්ගේ පිහිටෙන් ඒක එච්චර දැනෙන දෙයක් නෙමෙයි. හැබැයි දාඩිය මුගුරු දානවා වැඩියි. ඒ දාඩියයි, පෙරළුණු නැවුම් පසේ සුවඳයි, තැඹිලි දුඹුරු මුසු පස් පාටයි ඇරුණා ම ඒ එක්ක එන අමුතු පස් ගඳට ඇවරි හරි මනාපයි. ඒ දාඩිය මුසු ගඳ තමා වැඩේට අපිව බැඳ ගන්නේ.

ජනවාරි පළමුදා ඇවරිතුමාගේ පවුලේ අය ගංගාරාමෙට යාම පුරුද්දක් කරගෙන තිබුණා. දෙන්නා දෙමහල්ලෝ බයිබුරියේ වැඩ කරන කාලෙ ඉඳලා ම ළමයි ළපටි අරං ජනවාරි පළමුදා ගංගාරාමෙට ගිහින් හිටන් හාමුදුරුවො දෙන තුටු පඬුරු අරං ගනුදෙනු කරන්න පුරුද්දක් ඇතිවෙලා තිබුණා. ඒ ඩොලර් නෝට්ටුව, විස්සෙ කොළය, දහයෙ කාසිය තව පිරිත් නූල නොලැබුණොත් නිකන් අවුරුදු නෑ වගේ පුංචි බ්‍රම්පි හැඟීමක් දැනෙනවා. කිසිම වෙලාවක මාරු නොකරන ඒ නෝට්ටු වොලට්ටුවේ තැම්පත් වෙලා තියෙනවා. මේ සැරේ යනතරයක් හේමත් ලැබුණා. ජනේරුවේ පුස්තකාලයට ගොඩ නැඟුනා ම කිරිබත් කෑල්ලක් හේම කාලා තේකක් බීලා පොකට් ඩික්සනරි ඇන්ටි එක්ක හේම කයියක් දාගෙන හිටියා.

පුංචිකාලෙ අම්මා එක්ක ලයිබ්‍රි ආවම කැටලොග් කාර්ඩ්ස් දැකලා අනේ මටත් පොකට් ඩික්සනරියක් දෙන්න කිවවලු. කැටලොග් කාර්ඩ් ගොඩ අස්සේ ඩික්ෂනරියක් කොහේද කියලා බලාපු අනුලා ඇන්ටිට පස්සේ තේරිලා තියෙන්නේ මේ කොල්ලා පොඩිකමට ඉල්ලන්නේ කැටලොග් කාර්ඩ් එකක් කියලා. එදායින් පස්සේ ඇවරි මහජන පුස්තකාලයේ සේවකයන්ට පොකට් ඩික්සනරි පුතා වුනා වගේ ම ඇවරිට අනුලා ඇන්ටි පොකට් ඩික්සනරි ඇන්ටි වුනා.

තව ඇවරි, ඇවරි වෙන්න හේතුකාරනා වුන බෝතලෙන් කිරි බීම නැවැත්තුවෙත් අනුලා ඇන්ටි ම තමා. පුංචි කාලෙ අම්මා ෆාලින් කිරි බෝතලේ හදලා දුන්නා ම අයිස් ක්‍රීම් සෝඩා හරිම රසයි කියලා ගුඩුස් ගාලා එක හුස්මට කිරි බොන පුරුද්දක් ඇවරිට තිබුණා. මොන ඩොකා කිව්වත්, අම්මා කොච්චර තරවටු කළත්, දත් කොච්චර ඉස්සරහට ආවත්, ඇවරි නෙමෙයි බෝතලෙන් කිරි බීම නැවැත්තුවෙ. අන්තිමේදි දවසක් පුස්තකාලෙ ස්ටාෆ් රෙස්ට් රූම් එකේ ඉද්දි අම්මා ඇවරිට කිරි බෝතලයක් බොන්න ගෙනත් දුන්නා. ඇවරි ගැන දන්න අනුලා ඇන්ටි පුතා අද ඉඳන් කෝප්පෙන් බොන්න. මේ පොකට් ඩික්සනරි තියෙන ළමයි කිරි බොන්නෙ කෝප්පෙන් කිව්වා. කැටලොග් කාර්ඩ් වලට ඇති ආශාව නිසා මාත් ඇය පස්සෙන් වැටිලා ළමා අංශයට ගියා. ඉස්සර ළමා අංශය තිබුනෙ පහළ තට්ටුවේ. අර බිත්තියේ ඇඳලා තියෙන සත්තුන්ගේ රූප බලබල එදා ඇගේ කෝප්පෙන් කිරි බීලා කැටලොග් කාර්ඩ් ගොඩක් එක්ක ගෙදර ගිය ඇවරි ඊට පස්සේ කවදාවත් බෝතලෙන් කිරි බොන්න ඕන කියලා කරදර කළේ නෑලු.

අවුරුදු පෝසටුව අසසේ හද්දා පරණ යාන්ස් අමුණන්න වුණ එක ගැන සමාව ඉල්ලනවා. සිංහ ලේ හෙවත් බලෙ බලේ විත් හම්බ හැතිකරේ, 31 රෑ ෆීලින්ග් හයි ඇන්ඩ් ප්ලෑනින් 16 ඇට් ලොකල් පබ්, ජනේරු පළමුදා ඇවරි සම්බන්ධ වූ ෆස්ට් එවර් සයිබර් අපරාධය, මනාලියන් හයර් කරනු ලැබේ, කැවුම් බැරිනම් කොකිස් හදාපිය, අපේ ගෙවල් - තොට අරහං. වගේ හිට්ස් ඇතුළත් මීළඟ සලාදය ඉක්මණින් ලියන්න හිතාගෙන දැනට නවතින්නම්.

කලින් කිව්වා වගේ ම 2015 කියන්නේ පට්ට අවුරුද්දක් 2016 පට්ට පට පට එකක් වේවි. සහසක් පැතුම් ඉටුවන සුබ නව වසරකට ආසිරි!

මේ වගට;

නලින පතිරගේ / ඇවරි / ඇන්ඩෘ පතිරේජ් / බී.ජේ ඇවා