Thursday, March 30, 2017

පුරා කොමාගේ විලාසිතාව හෙවත් මිනිහා මාරු වුනාට අඩිය මාරු නොවීම...


අවුරුද්දේ ඉවෙන්ට්ස් අතර ඇවරිතුමා අනිවා යන ප්‍රදර්ශනයක් තමා ලෙදර් එක්ෂිබිෂම. ගිය පාර යන්න බැරි වුනේ වැඩි හා හූවක් නැතුව ම වැඩේ ගියපු නිසා. අවුරුද්දේ ඇවරි ටාර්ගට් කරලා බලන්න කැමති ටොප් ටෙන් ප්‍රදර්ශන අතර ජාතික හස්ත කර්මාන්ත ප්‍රදර්ශනය, ජාතික මැණික් ප්‍රදර්ශනය වන ෆැසෙට්ස් වගේ කිහිපයක් තියෙනවා. ගිය පාර වාඩුව අල්ලන්නත් එක්ක මේ පාර ඇවරි කලින් ම සූජානම් වෙලා වැඩේට සෙට් වුනා.

මුලින් ඇවරි හිතාන හිටියේ සෙනසුරාදාවේ ඒ වැඩේ යොදාගන්න. නමුත් ලෙදර් එක්ස්පෝව බලන්න අනිවා යන අංගනාවක් ඉන්න බව ඇවරිට අමතක වුනා. ඒ අපේ මාෂි මැතිනිය. දානමය පුන්‍යකර්මයක් සඳහා අම්බලන්ගොඩට සැපත් වූ ඕ තොමෝ ඉරිදාවේ ප්‍රදර්ශනය සඳහා එක්වන බවට කළ නිල නිවේදනය නිසා ඇවරිත් තමුන්ගේ ගමන ඉරිදාට යොදා ගන්නවා. ඉරිදාවෙ ජන්පින්ග් වැඩ අමාරු වුනත් උත්තමාවිය සහභාගීවන නිල උත්සවේට නෑවිත් බැරි නිසා හාය කියන්න ඇවරිට සිද්ධ වෙනවා. එදා ගුරු රැස්වීමක් තිබුණ නිසා වැඩේ තවත් වස්ති වෙන ගානයි. වෙන්න යන සන්තෑසිය ගැන දුර දක්නා නුවණින් කම්පනා කරගත් ඇවරි වහා ම මාෂියානෝ අමතා වෙලාව වෙනස් කරගන්න හැදුවත් එතුමිය ඇමතුමට ප්‍රතිචාර දැක්වූයේ නෑ. අන්තිමේදී ඇගෙන් ලද කෙටි පණිවිඩේ කියැවුනේ තවමත් පානදුරේ බවයි. ලද අවසරයෙන් සෙනිකෙට යෙදුන දිවා ආහාර ආරාධනාවකුත් බාරගත් ඇවරි දුරත් ගෙවාගෙන ගෑස් ගහගෙන, සෙමර සලාගෙන යද්දි මා මැජස්ටි පිටත් වෙලා. ඉතිං මොකේ දන් වළදන්නෙ කිව්වලු?? 

වන්නාට යහපත කියාගෙන ඇවරි දකුණු කකුළ පෙරට තියලා ප්‍රදර්ශන භූමියෙන් ඇතුලුවුනා ම ජපන් එක්ස්පෝව මඟ හැර ලෙදර් ප්‍රදර්ශනයට යන්න තීරණය කළා. ඇවරි ලෙදර් නිමැවුම් වල නිත්‍ය පාරිභෝගිකයෙක්. ජෙනුවින් ලෙදර් වල තියෙන වටිනාකම ඕනෑම දෙයක් ඔබ ජීවිතයේ වරක් පමණක් මිලට ගත යුතු වීම. උදාහරණයක් විදියට කැෂුවල් වෙයා සපත්තු. දැන් ඇවරි දාන කැෂුවල් ලෙදර් සපත්තු දෙක අවුරුදු දෙකයි මාස අටක්. එහි පළමු සේවා කාලය එළඹිලා. මුළු ජිවත කාලෙම ඒ සපත්තු දෙක අදාළ ආයතනය මගින් නඩත්තු කෙරෙනවා. ඒකට කියන්නේ බ්රෑන්ඩ් ලෝයල්ටි කියලා. ඇවරිට ඇත්තේ ජෙනුවින් ලෙදර් බෙල්ට් දෙකක් පමණයි. ඇවරි දැන් කාර්යාලයට ගෙනයන බෑගය ඇවරි තරම්ම වයසයි. පී. ජී මාර්ටින් එයිටීස් ක්ලැසික් බෑගයක් වන එය ඇවරිට නුවර මාමාගෙන් තෑගි ලෙස ලැබුණක්. සාමාන්‍යෙයන් ඇවරි බස් එකේ යද්දි මිනිස්සු මේ මොකා?? නිකන් පුරා විද්‍යා කොමසාරිස් වගේ කියලා බලනවා තමා. නමුත් ඒ බෑගයේ ඇතුළත නිමාව අතිශය ඉස්තරම්. එහි පෑනේ ඉඳන් හැම දෙයක් ම නියමාකාරයෙන් තැම්පත් කිරීමේ පහසුකම් සකසා තියෙනවා. කොටින්ම කොටුවෙ පී.ජී මාර්ටින් එකෙන් බොහොම සුළු මුදලකට ඒ බෑගයේ බකල් එක අලුත්වැඩියා කරලා දුන්නේ එච්චර කාලයක් ඒ බෑගය පාවිච්චි කිරීමට සැලකීමක් වශයෙන්.

ඇවරිගේ සපත්තු දෙක වුල්ෆ්ගැන්ග්. අවුරුදු හතරක් දාලා තියෙනවා. අඩිය පොඩ්ඩක් ගෙවිලා විතරයි. වත්තල ෂෝරූම් දුන්නා ම අඩියක් ගස්සවන්න පුළුවන්. වුල්ෆ්ගැන්ග් සන්නාමයේ තියෙන විශේෂත්වය තමා ඇතුලේ ඇති කුෂන් ෆෝම් එක. අපි සපත්තුවට බර දුන්නා ම එයා කුෂන් එක උඩ උඩට තෙරපන නිසා විශාල පහසුවක් දැනෙනවා. අනික හැමදාමත් කාල තරණයේ යෙදෙන ඇවරිට කෝච්චිය අල්ලන්න වුල්ෆ්ගැන්ග්දෙන සප් එක වචන වලින් කියන්න අමාරුයි. සපත්තුවට පින් සිද්ධ වෙන්න ඇවරි ලංගම ස්ටෑන්ඩ් එකේ ඉඳන් ෆ්ලෝටින් මාර්කට් හරහා කොළඹ කොටුවේ පස්වන වේදිකාවට මැරතන් වන් තර්ටිය විනාඩි පහට කරනවා. කෝචිචි නිසා ඇවරි නිතර කාලතරණයේ යෙදෙනවා. උදාහරණයක් විදියට ඔයාට එකට කිරිබත්ගොඩින් නැග්ගත් එකහමාර කොටුවෙන් අල්ලන්න පුළුවන්. ඊට පහුවුනොත් ගාලු කුමාරිය අනිවා ගන්නත් පුළුවන්. මුලින් ඩිලේ වුනාට එන්ඩින්ග් ඔන් ටයිම්.

මෙදාපාර තවත් හාෆ් ෂූ පෙයාර් එකක් ගැනීමේ අවශ්‍යතාව තිබුණා. හරියට ම කිව්වොත් අපේ මරුසිපාලට තෑගි දෙන්න. හාෆ් ෂූ පහසු වුනාට ලොකු ම අවුල පිටිපස්සේ විළුඹ හරියට ලොක් නොවීම. ඇවරිට විළුඹ - මැන්ඩිය කරද්දි එපා වෙන්නෙ ඒකයි. හැබැයි එක ප්‍රදර්ශන කුටියක හරි ම නිෂ්පාදනය තිබුණා. මේක නම් ගින්දර. මේ අවුල මේකෙ විසඳලා තියෙනවා. ඇවරි අදාල කළමනාකරුට පැහැදිලි කළා ම ඔහු වසර පහක සේවා නඩත්තුවක් සහතික කරමින් වෘත්තිය ආගිය විත්ති හේමත් ඇහුවා. ඇවරි කැමති අනික් පාවහන් විලාසිතාව සැන්ඩ්ල්ස්. ජෙනිවින් ලෙදර් සැන්ඩ්ල්ස් ලංකාවෙ මිනිස්සු පාවිච්චි කරනවා බොහොම අඩුයි. ඒකට සුද්දො, අවුරුදු ගාණක් එක ම සැන්ඩ්ල් එක දාන අය ඉන්නවා. නියම අඩිය, හම් පටි සහිත ජෝඩුවක් අවම රුපියල් හාරදාහක්වත් වෙනවා. නමුත් ලංකාවෙ දේශියව නිපදවන ලෙදර් පටි සහිත රබර් අඩිය ඇති ඒවා ලාබයි. ඒ අවුරුදු පනහට වැඩි අයගේ විලාසිතාව. ගිය 2015 ඇවරි දෙකක් ගෙනාවෙ හරි අහම්බෙන්.

පුතා මෙතන ටූ පීසස් වන් ග්රෑන්ඩ්. ඔයා එකක් ගත්තොත් මගෙත් වැඩේ කෙරෙනවා. නෝ ප්‍රොබ්ලම් සර්, ලෙට් මී සිලෙක්ට් මයින් කියලා රුපියල් පන්සීයකට තට්ටු කළාට ඒ පෙයාර් එක සෑහෙන්න කාලයක් දැම්මා. ඒක දැම්මාට ඇවරි නිකම් සුරපප්පා එකේ රෝමන් කාරයෙක් වගේ. ලොල්..
බ්‍රිටෝ ලෙදර්හි නිරෝ හමුවීමේ වුවමනාවකුත් ඇවරිට තිබුණා. ඇවරි කෝපරේට් වැඩකට එයාලගෙන් ලෙදර් ෆයිල් කවර කිහිපයක් ගත්තා. ඒ4 ප්‍රමාණයේ රෙක්සින්, කළුපාට සිප් එක සහිත කවරය වෙළපොලේ හාරසීයක් වෙද්දි හයි එන්ඩ් ලෙදර් කේසින් එක හාරදාහක් වෙනවා. හැබැයි නිමාව අතින් විස්කිම තමා. ඒ ඩීල් එකෙන් නිරෝ ෆිට් වුනා. බ්‍රිටෝලා යුරෝපා වෙළඳපොලට ලෙදර් සපත්තු සහ බෑග් තොග පිටින් නිෂ්පාදනය කරන ආයතනයක්. එහෙම තුන් හාරදාහේ ලොකු ඕඩර්වලින් ඩිෆෙක්ට්ස් එයාලගේ ෂෝරූම් එකේ අඩුවට දෙනවා. නිරෝ මට විශේෂයෙන් බෑග් එකක් ගෙනත් තිබුණා. ඒක ගන්න ඇවරි ඈව මුණගැහෙන්න ගියා. යුරෝපයේ ලෙදර් බෑග් යුනිසෙක්ස් විදියට ගියත් ලංකාවෙ පිරිමි අතර ප්‍රසිද්ධ මෙසෙන්ජර් බෑග් විතරයි. ඇවරිගේ බොස් දැඩි ලෙදර් බෑග් රසිකයෙක්. පටි දෙකක් සහිත ඔහුගේ කාන්තා විලාසිතාවට ආසන්න අත් බෑගයේ පටිය ගැලවිලා ඒක හදාගන්න ලංකාවට ආපු වෙලාවෙ වරුවක් ම වෙන් කරලා තිබුණා. මොක ද ඒ බෑගයට ඔහු එපමණ ආසයි.

ලෙදර් සපත්තුවල ගොඩක් ලේස් නැතුව තමා එන්නේ. කළු සපත්තුවල විතරක් ඇතැම් විට ලේස් දකින්න පුළුවන්. නමුත් බ්‍රිටෝලගේ ලේස් ඇති දුඹුරු පැහැ සපත්තු තියෙනවා. තව අර යකඩ මුදු වද්දපු අවුට් ඩෝර් ෆ්ලැට්, රවුන්ඩ් ෆ්රන්ටඩ් සෝල් එක එයාලගේ අවුට් ඔෆ් ස්ටොක්. ඒකේ සාම්පල් පෙයාර් එක රුපියල් හත්දාස් ගාණක්. නමුත් ඇවරි පිතා තෑගි දුන්න ඒ පෙයාර් එක ම අඩියක් නැතිකමින් පැත්තකට කරලා තියෙනවා. හයියෝ සංසාරේ.

ඇවරි පිතාගෙ වෙඩිමට දාපු තිත් මෝස්තරේ ලෙදර් සපත්තු කුට්ටම තාමත් තියෙනවා. ඒකෙ දැන් මිල පන්දාහක් විතර වෙනවා. ලෙදර් සපත්තු, වැක්ස් බොටල් නැතුව ටින් එකෙන් මැදලා සුද්ද කරනවා නම් දීර්ඝ කාලයක් තියාගන්න පුළුවන්. අර ලික්විඩ් එකේ තිනර් එකට සපත්තුව පිච්චෙනවා. නියම ලෙදර් ගන්න නම් ඔබ ලයිටරයක් හරි ගිනි පෙට්ටියක් හරි අරන් යන්න අමතක කරන්න එපා. ඇවරි මුලින් ම ජෙනිවින් ලෙදර් එකටත් කියන්නේ මේක නම් සින්තටික් කියලා. පිස්සු ද සර් ඉන්පෝර්ටඩ් ලෙදර් බෙල්ට් කිව්වොත් සාක්කුවෙන් ලයිටරේ පෙන්නලා පුච්චමු ද අහනවා. බොරු කිව්වෙ නැත්නම් දාරයක් පුච්චන්න වෙළෙන්දා බය වෙන්නෙ නෑ. ලෙදර් පර්ස් එහෙම ලාබෙට දෙනවා නම් බය නැතුව පුච්චන්න. සින්තටික් නෙමේ නම් මුකුත් වෙන්නෙ නෑ.

ඇවරිට රුපියල් තුන්සීයට නියම ලෙදර්වලින් කළ බෙල්ට් එකක් හම්බුනා. මේක නම් සින්තටික් පුච්චමුද කියලා ලයිටරේ ගත්තා ම, එපා සර් මා ළඟ බඩු තියෙනවා කියලා වෙළෙන්දා ම පිච්චුවා. වාව් මේක නම් ගින්දර, පිස්සු හැදෙනවා කියලා ඇවරි පුදුම වෙච්ච පාරට සෑහෙන්න හයියෙන් කෑගැහුවා. ඇවරිගේ කටේ සද්දේ දන්නවානේ. මිනිස්සු ඔක්කොම හැරිලා බැලුවා. ඒ ලෙදර් බෙල්ට් ටික සෙනිකට වාස්ප කියහන්කෝ. ඔක්කොමත් හරි සර්ගේ කමෙන්ට් එකෙන් තමා වැඩේ පත්තු වුනේ. එය පවුලේ ව්‍යාපාරයක්. එයාල වෙස්ටේජ් ආපු ලෙදර් ස්ට්‍රැප් වලින් තමා බෙල්ට් කරලා තියෙන්නේ. තව හීනි පටිවලින් කාන්තා ගවුම්වලට කළ වේස්ට් බෑන්ඩ්ස් එහෙමත් ඒ අය වික්ක. ඒ ප්‍රයිස් එකට දෙන්නේ ඒවා ද්විතීක නිෂ්පාදන නිසා. ඒ සියලු දෙනා ඇවරි එක්ක මිත්‍ර වුනා. ආයෙත් එන්න සර් මෙන්න කාර්ඩ් එක.


හැපී සොපින් කියන්නේ මේවට තමා. දැන් ඊළඟ පාර ඇවරි යන්නේ මේ නෑදෑකම් අලුත් කරගන්න. අපි හිතුවට අයියෝ ලෙදර් අපිට අදාළ නෑනේ කියලා, ඔබ නිත්‍ය පාරිභෝගිකයෙක් වුනා ම ඔබේ මෙවලම් ගැන, ඒවායේ වැඩි දියුණුකිරීම් ගැන දැනගැනීම සතුටක් වේවි. ඇවරිට නම් ලෙදර් කියන්නේ ලක්ෂරි නෙමේ. ගුණාත්මක තත්ත්වය සහ කල්පැවැත්ම. ඒ හැම එකට ම වඩා පරම්පරාවෙන් පරම්පරාවට යන විශ්වාසය තමා ලෙදර් පාවිච්චියේ ලොකුම රහස. සර්, හරි සීරියස් කස්ටමර්ස්ලා ගන්නේ එක ම සපත්තු ජෝඩුවක් විතරයි. ඕනෑම කාලයක් අපි ඒක මේන්ටේන් කරනවා. ඇවරිට එහෙම කිව්වේ බොහොම හිතවත් වෙළෙන්දෙක්. 

2 comments:

ඉයන් said...

සම් භාණ්ඩ වලට ආසාවක් ඇතිවුණා

නලින පතිරගේ said...

බොහොම ස්තූතියි ඉයන් පැමිණීමට, පුංචි මිනිස්සුන්ගෙන් සම්භාණ්ඩ ගන්න ඔබටත් හිතක් පහල වුනානම් ඒක ලොකු දෙයක්... :)