Friday, April 23, 2010

ගම් මැද්දේ අවුරුද්දේ.........!! (දෙවන දිගහැරැම)

කකුළු දඩයම

බෙන්තර ගං කොමළිය මතින් ඉහළට ඇදී ගිය අප විසල් ඉවුරැ දෙපස සංචාරක නිවහන් අධ්යතයනය කරමින් හබල් ගෑවෙමු. එම ප්රවදේශයේ කර්මාන්තය බොහෝ සෙයින් වර්ධන වී ඇති බව පෙනෙන්නට තිබේ. විශේෂයෙන් ම අයිඩා ආයතන සමූහය ඒ සඳහා මුල් වී ඇති බව කිය යුතුය. අතර මඟ දී කකුළු අතංගු ඇති ප්රිදේශ සලකුණු කරමින් යොදවා තිබුණු බෝයාවල් දුටු මල්ලී ඒ පිළිබඳ තාත්තාගෙන් විමසන්නට විය.
ඒවා කකුළුවන් අල්ලා ගැනීමට යොදා ඇති උගුල් බවත් මෙම උගුල් ඇති ස්ථානය දැක්වීමට ඒ ආකාරයට බෝයා යොදා ඇති අතර අතංගුව ගං පතුළට ම ගමන් කරන බවත් තාත්තා පැහැදිලි කළේය. මේ අතර නුවන් අයියා විසින් අඟුල අතංගුවක් ආසන්නයට ගෙන නතර කරන ලදී. කකුළුවෙකු ගොඩ ගනිමු දැයි ඇසූ ඔහු උත්තරයක් දෙන්නට පෙර බෝයාව ඉහළට ඔසවීම ආරම්භ කළේය. ක්රොමයෙන් දිගු නයිලෝන් නූලක් ඉහළට පැමිණි අතර අවසානයේ දී රවුම් යමක් ඉහළට එන බව සන් කරමින් ගං දිය කැළඹෙන්නට විය. අවසානයේ දී බයිසිකල් රිම් එකක් දියෙන් මතු විය. මල්ලීත් මමත් නාසය තද කරගනිමින් පිළිකුළ පළ කළෙමු. ඒ මත කකුළුවන් දෙදෙනෙකු ඇමිණී සිටිනු දක්නට හැකි විය. ඉන් එකෙක් කුඩා කකුළුවකු වූ නමුත් අනෙකා දිගු අඩු ඇති ශක්ති වන්ත කකුළු නාම්බෙකු විය.
කකුළුවන් දෙදෙනා ද සමඟ රිම් එක ඔරැවට ගත් අයියා වඩාත් හොඳින් දැක ගනු පිණිස එය ඈත් මෑත් කර පෙන්වීය. වඩාත් හොඳින් බැලූ කල එහි වටකුරැ යමක් රඳවා තිබුණි. එය රබර් කැබැල්ලකට සමාන වූ නිසා මා සිතුවේ කකුළුවන් ඇල්ලීමට ගන්නා උපකරණයක් ලෙසය. නමුත් මගේ අනුමානය නිවැරදි නොවීය. ඒ වූ කලි හරක් බොක්කකි. මෙම හරක් බොක්ක යොදා ගනු ලබන්නේ ඇමක් වශයෙනි. එය දරා ගත නොහෙන දුර්ගන්ධයකින් යුක්තය. අතංගුව වෙත කකුළුවන් ඇදී එන්නේ එම දුගඳ නිසා යැයි කී අයියා අතංගු එළීම විස්තර කර දුන්නේ ය.
‘මේක ගඳ ගහන්නේ හරක් බොක්ක නිසා. අපි හරක් බොකු අරන් ඇවිත් කලින් දවසේ කඳුරු ගස් වල උඩින් ගැටගහල තියනවා. නැත්නම් කකුළුවන්ට කළින් කබරු ඒක ඇදගෙන යනවා. පස්සේ රිම් එකට හරක් බොක්ක ගැට ගහලා වටේ දැලක් එළලා රිම් එක නයිලෝන් ලණුවක ගැටගහලා ඒක ගිල්ලනවා. මේ ලණුව දිගට ඕනෑ. මොකද අතංගුව ගං පතුළට ම යන්න එපෑයැ. දැන් දිය යටට මේක දැම්ම ම මේවගේ ම ගඳ ගහනවා. ඒ ගඳට තමයි කකුළුවන් ඇදෙන්නේ. උන් හරක් බොක්ක කඩා ගන්න උපරිම උත්සහයක් ගන්නවා. නමුත් ඒක ගැටගහන්න ගන්න පට්ටා වතුරට දැම්මහම සෙවලයි. ඇල්ලුවහ ම ලිස්සන හින්දා උගේ ශක්තිමත් අඩු වලට මේක කඩා ගන්න බෑ. අනික් අතට කඩන්න උත්සහ ගන්න වාරයක් වාරයක් පාසා කකුළුවා තවත් හිර වෙනවා. අපි අතංගුව දවල් වෙද්දි උස්සන කොට දෙතුන් දෙනෙක් අහුවෙලා.
මේ අතංගු හැම තැන ම එළලා වැඩක් නෑ. කකුළුවන් ඉන්න තැන් තියෙනවා. උදේ එකොළහට විතර වඩදිය ගලන්න ගත්ත ම කකුළුවො යන නිසා ඉන් පස්සේ අතංගු දිය යට තියලා වැඩක් නෑ. හැබැයි එකම හරක් බොක්ක කීප සැරයක් ගන්න පුළුවන්. අද අවුරුදු නිසා කවුරුත් මේ පැත්තේ ඇවිත් නෑ වගේ. මේ ජේමිස් මාමගේ අතංගු. අපි මුං දෙන්නව අරං යමු. මදි පාඩුවට ගෙදරත් ඇති.’ කී අයියා රිම් එකෙන් කකුළුවන් දෙදෙනා ගළවා ඔරුවේ දමා ගත් අතර උගුළින් ගැලවීම පිළිබඳ සොම්නස් වූ ඔවුහු ඔරුව තුළ ඒ මේ අත ගමන් කළහ.

No comments:

Post a Comment

ඈවරයි දෑවරයි.... කොටන්නට අවසරයි.....